شلون تختارين قطاعة الكوكيز المناسبة؟

لما نتكلم عن قطاعات الكوكيز, مهم نعرف إنها عالم واسع من الخيارات و الأشكال و النوعيات و الألوان, و اختيار القطاعة المناسبة يلعب دور وايد كبير في النتيجة النهائية لقطعة الكوكيز, و في توفير الوقت و الجهد.

قطاعات الكوكيزممكن تنباع بشكل فردي, و بعض الأحيان تكون مجموعة مع بعض بثيم واحد, مثل مجموعة القطاعات المناسبة لفصل الشتاء مثلا, أو العودة للمدرسة و غيرها من المواسم و المناسبات.

و لأن أكثر سؤال يوصلني على صفحتي هو شلون نعرف النوعيات الجيدة من قطاعات الكوكيز, و شلون نختار منهم, خليني أكلمكم عن الأنواع الأساسية لقطاعات الكوكيز حسب المادة المصنوعة منها هاذي القطاعات, و سلبيات و إيجابيات كل نوع منهم, و شلون تختارون قطاعة الكوكيز المناسبة.

أولا: قطاعات الكوكيز المصنوعة من الألمنيوم.

هي تعتبر الأكثر انتشارا و توفرا, وسعرها يعتبر الأرخص, هاذي النوعية من القطاعات تكون خفيفة جدا, و سهل تنثني بسهولة مع الضغط الخفيف عليها, و بالتالي من وجهة نظري ممكن تستخدمونها حق ثيم محدد, يعني استخدام بسيط و ما يكون اعتماد كامل عليها.

البعض يفضل هذا النوع من القطاعات لأنه مثل ما قلت لكم سهل تغيير شكلها مع شوية ضغط, ممكن اذا كان شكلها مستطيل مثلا, و حابين يخلون العرض أرفع شوي يقدرون يضغطون عليها و يغيرون شكلها, بس أنا شخصيا ما أفضلها.

ثانيا: قطاعات الكوكيز المصنوعة من البلاستيك.

هالنوعية من القطاعات أنا شخصيا أستخدمها وايد في شغلي, و أفضلها لإنها أريح بالاستخدام, و بما إني أطلب قطاعاتي كلها من برة وتكون بمقاسات محددة أنا أختارها, يتم صنعها بماكينات طباعة الثري دي و بالتالي تكون بلاستيكية, لهالسبب أفضلها لأغنها تكون بالشكل و المقاس اللي أبيه.

أيضا هالنوعية من القطاعات مناسبة لاستخدام الأطفال و آمنة لهم , و هاذي بعد تعتبر من مميزاتها, و الأهم انها تجنبنا مشكلة صدأ قطاعات الكوكيز بعد الغسيل.

ملاحظة مهمة اذا قررتوا تشترون هاذي النوعية, تتأكدون إن مكان قطع عجينة الكوكيز يكون رفيع و حاد, عشان يسهل عليكم عملية تقطيع الكوكيز, لأن بعض اللي يشتغلون في تصميم قطاعات الكوكيز ما ينتبهون لهالنقطة و يكون طرفها عريض و بالتالي يكون تقطيع الكوكيز جدا صعب.

ثالثا: قطاعات الكوكيز المصنوعة من الحديد أو الستانلس ستيل.

هالنوعية ممن القطاعات يكون سعرها أعلى شوي من النوعيات السابقة, بس ميزتها انها ممتازة لتقطيع الكوكيز و تعطينا حواف مرتبة و متناسقة, خصوصا في التصاميم اللي يكون فيها زوايا و انحناءات تخلي لنا الشكل مضبوط و مرتب.

مشكلتهم انك لازم تنتبهين تماما لتجفيف كل قطاعة بعد الغسل, و مهم تتأكدين انه ما بقى عليها أي آثار ماي لأنها بسرعة تتعرض للصدأ و بالتالي تصير غير صالحة للاستخدام.

رابعا: قطاعات الكوكيز المصنوعة من النحاس.

وهي النوعية الأعلى سعرا بين قطاعات الكوكيز, بس بنفس الوقت تعتبر استثمار, لإنها تقريبا تجمع كل مميزات الأنواع السابقة, أطرافها حادة و تقطيعها ممتاز, و ما تكون حادة جدا و بالتالي يقدرون الأطفال يستخدمونها, وزنها ثقيل شوي و تبقى عندك سنين بدون ما يصيدها شي, و الأهم انها مقاومة للصدأ.

هالنوع من القطاعات مناسب للأشكال اللي تستخدمينها وايد في أغلب الثيمات, لأنها تستحمل شغل و ضغط و تبقى بحالة ممتازة.

شلون نعرف كل قطاعة كوكيز من شنو مصنوعة؟ تكون كامل التفاصيل مكتوبة على العبوة اللي تيجي فيها القطاعة, و في حال كنتوا بتطلبونها من مواقع أجنبية, تكون كامل تفاصيل القطاعة مكتوبة في صندوق الوصف قبل الشراء.