شلون تبتدين مشروع كوكيز ناجح و توصلينه لأكبر عدد من الناس؟

بداية شغلي في مجال الكوكيز كانت بسيطة جدا, و بصراحة ما كان في بالي أبدا إني أفتح بزنس و أطور نفسي, كانت تجربتي الأولى بس من باب الفضول, حبيت الفكرة من هالفن الجميل, و حبيت أجرب, و فعلا ما كان عندي حتى قطاعات كوكيز, سويت العجينة و قطعتها بأشكال عشوائية, و زينتها و خذيتها معاي حق تجمع عائلي , كنت فرحانة في كوكيزاتي وايد و حابة آخذ رأيهم فيهم بس مو أكثر !

أكثر من اقتراح جاني منهم إنه ليش ما تفتحين مشروع ؟ الكوكيز وايد لذيذ و فكرته لطيفة ! في البداية بصراحة ما أخذت الموضوع بجدية ولا فكرت فيه, بس بعدين و مع كثر إلحاحهم و إصرارهم , فكرت بالموضوع بجدية أكبر شوي.

من لما دشت الفكرة في راسي, ابتديت أحاول أستغل أي مناسبة قادمة عائلية أو في إطار الأصدقاء, عشان أسوي كوكيز و آخذه معاي, كنت حابة أخلي كل اللي يعرفوني يجربونه و آخذ رأيهم فيه !

و فعلا بفضل الله لاحظت إن الكل يحب الطعم وايد, طبعا الشكل كان جدا جدا بسيط و لا يذكر, بس مستوى التعليقات و الاقتراحات صار أكبر, و صار ماشي باتجاه إنه لازم يكون لك مشروعك الخاص و لوغو و حساب انستغرام عشان الناس تعرفك !

أوكي.. الموضوع صار جدي وايد و ما فيه مزح , لوغو ؟!! شلون بسوي لوغو ؟ و مين بيسويه لي؟! و طبعا تبنت الموضوع أختي اللي دارسة أصلا تصميم, و كان شعار لوللوسا كوكيز الأول و الإنطلاقة الأولى لي على انستغرام !

الحين بلخص لكم الخطوات اللي اعتمدتها في بدايتي عشان أوصل مشروعي للناس, و مع إضافة اللوغو و بيانات التواصل على قطع الكوكيز, صارالهدف الأساسي ناس جدد و بالتالي زبائن مهتمين .

1 . في البداية ما كان هدفي الكسب المادي أبدا, لأني أآمن بمقولة سمعتها من أحد متخصصين التسويق, إن المشروع في أول سنة انت تصرف عليه , و ثاني سنة المشروع يطلع مصروفه , و السنة الثالثة المشروع يصرف عليك ! مقولة منطقية صراحة , و بالتالي أول فترة كان هدفي الوصول للناس و ليس الكسب, و بالتالي كنت ما أفوت مناسبة أو تجمع إلا و آخذ معاي كوكيز بدون أي مقابل.

2 . أي احتفال في مدرسة بنتي, كنت أرسل معاها كوكيز يناسب المناسبة , مع اللوغو و بيانات التواصل على كل قطعة كوكيز.

3 . و في نفس فترة التسويق و الانتشار المجاني, كنت مركزة وايد على رفع مستوى شغلي و تطويره, لأن الناس اللي يوصلهم الكوكيز بديهيا بيدخلون صفحتي الانستغرام, و يهمني يشوفون شغل مميز يجذبهم !

4 . و عشان يكون في محتوى في حسابي, مع عدم وجود زبائن كثيرة و طلبات لغاية اللحظة, ابتديت أخبز كوكيز و أزينه فقط عشان أعرضه في الحساب, و بعدين أقطه أو أعطيه لأي أحد في العائلة, كنت أبتكر تصاميم جديدة, و أشكال جديدة, عشان اللي يدشون صفحتي في الانستغرام يلاقون محتوى مميز.

5 . صار الكوكيز هو المعتمد عندي كهدية لأي مناسبة توصلني دعوة عليها, عيد ميلاد ولد صديقتي, خذيت معاي بوكيه كوكيز على أعواد و لفت انتباه الكل في الحفلة, صديقتي ولدت صبي, كوكيز بثيم بيبي بوي خذيته معاي على المستشفى و كانت تقدمه لكل اللي يزورونها, و طبعا كنت وايد أهتم بطريقة التقديم و المظهر الخارجي, كنت أسوي بوكيهات الكوكيز على أعواد لأنها وايد تلفت الانتباه.

6 . لما ابتدت توصلني طلبات من الزباين, كنت أطلب سعر قليل بالرغم من المجهود الكبير اللي أبذله, بس كان هدفي سعر يناسبهم عشان يطلبون مني, و كل وحدة من هالزبونات بتوزع الكوكيز في مناسبتها يعني مجتمع جديد و جمهور أكبر!

7 . شاركت أكثر من مرة في معارض و كرنفالات , كنت أجهز كميات من الكوكيز بثيمات مختلفة للأولاد و البنات , و أحاول ألفت الانتباه لها بالاهتمام بالشكل الخارجي, كنت أربط شرايط ملونة مثلا على كيس الكوكيز عشان ألفت انتباه الأطفال له , و طبعا أخلي سعرها قليل و في المتناول لأن أحط في حسابي إنه كل عائلة عندها أكثر من طفل, و بالتالي مهم السعر يناسبهم عشان يشترون مني و يجربونه.

8 . بعد ما طورت مستوى شغلي شوي, تواصل معاي محل كبير و عرض علي أجهز لهم كوكيز بتصاميم كلاسيكية, و يبيعونهم عندهم في المحل, و طلبو مني سعر قليل طبعا عشان ياخذون مني كميات بحكم انهم محل مختص بتجهيزات الأعراس, و طبعا وافقت بدون تردد و كانت هاذي أول صفقة عقدتها في مجالي, بس ما استمرت لفترة طويلة لأني اكتشفت انهم يشيلون اللوغو مالي و يحطون لوغو محلهم, و بالتالي أنا ما استفدت شي غير التعب, و بما إنه هدفي الأساسي الوصول لجمهور جديد و ليس البيع فقط, لغيت الفكرة و اعتذرت لهم.

9 . مثل ما قلت لكم هدفي الأساسي كان جمهور و زباين أكثر, ليش؟ لأن زباين أكثر يعني إني أشتغل ثيمات و تصاميم أكثر, يعني محتوى أكثر في حسابي, و مهما كان السعر قليل , في النهاية بيكون أحسن من إني كنت أشتغل و أتعب بس عشان أصور و بعدين أقطه بدون فايدة.. منطقي صح؟

10 . و شوي شوي بفضل الله تعالى, ابتدت الطلبات عندي تزيد شوي شوي, و ابتدت دائرة الناس اللي يعرفوني تتوسع شوي, و كل ما كانت الطلبات تزيد عندي كنت أرفع سعري شوي شوي, بما يتلائم مع وقتي و جهدي اللي أبذله في كل أوردر.

11 . و مع زيادة الطلبات, و زيادة ساعات شغلي في هالمجال, ابتديت أتقنه أكثر و مستواي ابتدى يتطور شوي شوي, و صرت كل فترة أجمع مبلغ من الطلبات و أطور شغلي, مثلا في البداية ابتديت بألوان أساسية فقط للآيسينج, بعدين ابتديت أطلب درجات مختلفة من الألوان, كنت كل فترة أجمع مبلغ و أشتري جهاز جديد أطور مستواي فيه مثل جهاز الإيربرش و البروجكتر و غيرهم.

في النهاية اللي حابة إنك تعرفينه إنه مافي مشروع ينجح بروحه فجأة و بدون تعب! كل شي في الدنيا يمر بخطوات و مراحل وايد عشان يوصل للمستوى اللي تكونين فيه راضية عنه, اشتغلي أكثر على مستواكي و طوريه, و لا تستعجلي الوصول و النجاح, إتعبي و إسهري و اتحدي نفسك, اخسري فلوس في البداية و لا تنتظرين الربح و المقابل, حبي شغلك و أبدعي فيه و أعطيه من كل قلبك, لغاية ما توصلي لمرحلة إنه شغلك هو يتكلم عنك بدون لا تتكلمين.

أتمنى لكم التوفيق من كل قلبي, و أتمنى أشوف مشاريع تزيين الكوكيز تارسة الوطن العربي كله و أكون فخورة جدا جدا فيكم !