أم و صاحبة مشروع منزلي !

أم و صاحبة مشروع منزلي ! المهمة غير المستحيلة !

مهمة الأمومة بحد ذاتها تعتبر مهمة صعبة و تحتاج تفرغ تام, تحتاج وقت و تركيز مستمر منك, و هي وظيفة مستمرة 24 ساعة بدون إجازات, أكيد تتفقون معاي !

طيب شلون لو كان عندك وظيفة ثانية بعد في نفس الوقت و المكان و وبعدد كبير من المهمات و لازم تسيطرين على كل هذا مرة وحدة, البعض ممكن يتخيل إنها المهمة المستحيلة , بس صدقيني كل شي يبتدي صعب و يصير أسهل شوي شوي, طبعا مو المهمات نفسها هي اللي تصير سهلة أو الإلتزام يخف, لا , تصير أسهل لأن ببساطة بتتعودين عليها مع الوقت و بتنظمين أمورك أكثر من قبل, هاذي طبيعة الإنسان اللي خلقنا عليها الله سبحانه و تعالى, نقدر نتأقلم مع أي وضع جديد انحطينا فيه, و هاذي بحد ذاتها نعمة!

لما تتشفي إنه عندك شغف في مجال معين, و تحسين إنك حابته وايد و شاغل عقلك و تفكيرك, بس بنفس الوقت انتي مسؤولة عن عائلة و أطفال, ومسؤولة عن تأمين طلباتهم واحتياجاتهم, التزاماتك كبيرة و هالشي يخلق في داخلك خوف من إنك تزيدين المسؤوليات على نفسك و ما تقدرين توفقين بين كل الأطراف, و أكيد بتقصرين, بيكون قرارك هني إنه خلاص العائلة أهم و الشغف و الطموح شي ثانوي, بس في نفس الوقت شغفك شاغل تفكيرك و مو قادرة تقاومين هالشعور, كل اللي تمرين فيه يا عزيزتي أنا مريت فيه حرفيا , و أنا هني عشان أكتب لك خلاصة تجربتي مع الأمومة و الشغل الخاص في نفس الوقت!

في البداية مهم جدا يكون عندك قناعة تامة إنه كل شي يبتدي في بدايته صعب, و لا ترفعين سقف توقعاتك إنك بتقدرين تنسجمين مع الوضع الجديد بسرعة و بتقدرين تكونين الأم الأخطبوط اللي تسوي كل شي في نفس الوقت و على أكمل وجه !

لما نتكلم عن موضوع الشغل الخاص اللي بتبتدينه بروحك و بتديرينه و بتكونين مسؤولة عن كل تفاصيله, لازم ما نستهين أبدا بهالموضوع و نعطيه قيمته و قدره, و لازم تكونين متحضرة نفسيا إنك مقبلة على شي مو سهل و يحتاج منك وقت و تفكير و تركيز , بس تذكري دايما إنه شي مو مستحيل !

تنظيم الوقت من الأشياء الأساسية عشان تقدرين ترتبين أمورك و تخلي الأمور تحت السيطرة قدر المستطاع, رتبي أولوياتك من الأهم فالمهم, ابتدي بالأشياء اللي مهم جدا تخلص و صعب تأجيلها, وتدرجي شوي شوي للأمور الأقل أهمية, سواء كنتي تشتغلين في مجال الطبخ أو الحلويات, مجال الحرف اليدوية مثل التطريز و غيره, أو الشغل الأونلاين, كلها فيها مهام لازم يتم إنجازها الحين و مهام ثانية تنتظر شوي, رتبيها كلها في ورقة و قلم و امشي عليها بهدوء.

التقصير لابد منه في البداية, و ماله داعي تضيعي وقتك و استمتاعك بموهبتك في جلد ذاتك و مشاعر تأنيب الضمير, كل شي بيمر بإذن الله , بس الأهم انك ما تستسلمين و تعرفين إنها البداية فقط, و تقتنعين إنها بتصير أسهل شوي شوي و التقصير بيصير أقل بوايد.

لا تضغطين نفسك في البداية, ابتدي بخطوات صغيرة و خذي وقتك في كل خطوة, و لا تستعجلي الوصول و النجاح, و دايما ذكري نفسك إنك قاعدة تقومي بعمل عظيم بالرغم من مسؤولياتك و ضيق وقتك, بس بإذن الله قريبا جدا بتحصدين ناتج هالتعب كله و بتشوفين نتائج تسعدك وايد.

بساعدك اليوم في بعض النقاط اللي ممكن تسهل عليكي الإلتزام بعملك الخاص من البيت, و في نفس الوقت تقلل الجهد اللي تبذلينه و تساعدك تتأقلمين شوي مع الوضع .

أولا: إذا قدرتي تأمنين أحد يساعدك و يخفف عنك المهام, يكون وايد زين !

مثل المساعدة المنزلية أو أي شخص آخر ممكن يقدم لك الدعم اللي تحتاجينه و يساعدك تنجحين مشروعك ويخفف عنك الأعباء و المسؤليات, ممكن هالشخص يكون مساعدة منزلية تخفف عنك مهام و مسؤوليات البيت اليومية, أو ممكن يكون شخص قريب يستلم عنك موضوع إدارة المشروع من ناحية ترتيب الطلبات, تغليفها, التواصل مع شركات الشحن و غيره.

ثانيا: لا تتركين لنفسك الوقت مفتوح بالكامل بحكم إنه مشروعك الخاص و إنك تشتغلين من البيت !

تعاملي مع شغلك و مشروعك مثله مثل أي وظيفة ثانية خارجية, حددي ساعات محددة في اليوم تشتغلين فيها على مشروعك, تردين على رسائل الزبائن, تتابعين أمور الشغل, بحيث ما يشتتك شي و يكون تركيزك فقط على الشغل, و من يخلص الوقت المحدد خلاص, اتركي عنك أي شي يتعلق بالمشروع و ركزي أكثر على مسؤلياتك الثانية سواء البيت أو الأطفال, الاتزامات العائلية و غيره, لا تخلطي المهام في بعضها عشان لا تضيعين و تتشتتين و تدشين بحالات من الضغط و التوتر.

ثالثا:استثمري في الأجهزة !

استثمري كثر ما تقدرين في الأجهزة اللي تسهل شغلك و اللي تتعلق بالمجال اللي تشتغلين فيه, دايما خليكي ملمّة في مجالك و تعرفي على الأجهزة اللي تساعدك تخففين الجهد و الوقت على نفسك, بتفرق معاكي جدا في الوقت اللي تحتاجينه لمشروعك.

رابعا: استخدمي دائما ورقة و قلم !

سجلي كل المهام اللي لازم تخلصينها, و الوقت اللي لازم تخلص فيه, أو تقدرين تستفيدين من تطبيقات الهاتف اللي تساعدك تنظمين جدولك, و تذكرك بالمهام و الطلبات اللي لازم تسلمينها.

خامسا: ابدئي يومك مبكرا !

من المفاتيح الرهيبة اللي اكتشفتها مع الوقت, إنه الوقت اللي تقومين فيه و تبدئي فيه يومك يفرق جدا في إنجازك للمهام !

كل ما بدأتي يومك قبل, كل ما حسيتي بركة في الوقت و طاقة أكثر, استغلي نوم الأطفال مثلا و قومي قبلهم, الساعات الي تقومين فيها الصبح و الأطفال نايمين أنا أسميها ساعات ذهبية !

سادسا: اهتمي بسبل الراحة خلال شغلك!

حاولي جهدك تختارين المكان أو الزاوية اللي بتشتغلين فيها بعناية! كرسي مريح, طاولة ارتفاعها مناسب, و غيره ممن التفاصيل اللي تأثر على راحتك خلال الشغل, لأن شغلك بيكون يومي, مهم نختار الوسائل اللي ما تأثر علينا و على صحتنا على المدى البعيد.

سابعا: خصصي وقت خاص لك !

هالنقطة على كثر ما أغلبكم يعتبرها مستحيلة, على كثر ما أشوفها مهمة جدا و واقعية و ضرورية!

ليش دايما نفهم هالنقطة إنك لازم تتركين كل شي و تسافرين بروحك؟ أو تقضين يوم بالكامل برة بدون مسؤوليات !

لما أقول وقت خاص لك, أقصد وقت تسوين فيه الشي اللي يسعدك و يعدل مزاجك مهما كان هالوقت قصير, ممكن يكون 10 دقايق بس, بس ما تتخيلين شكثر يعطيكي طاقة و يجدد نشاطك !

عن نفسي.. وقتي الخاص هو إني أسوي لي كوب قهوة و أشربه بهدوء !

و في النهاية نصيحتي لك إنك تتعاملي مع الأمور بوسطية و اعتدال, و لا تحملين نفسك فوق طاقتك عشان تستمتعين في مشروعك بالطريقة الصحيحة !