خطوات تساعدك تجتازين مواسم الكوكيز الكبيرة بسلاسة !

تحضير طلبية كوكيز كبيرة !

الطلبات الكبيرة تعتبر التحدي الأكبر اللي تواجهه أي وحدة تشتغل من البيت بروحها, سواء في مجال الكوكيز و الحلويات , أو الأعمال اليدوية أو غيرها من المشاريع

بس مهم تعرفين عزيزتي إن مافي شي مستحيل , و الطلبات الكبيرة ماهي إلا دليل على نجاحك و ثقة الناس الكبيرة فيكي, و هالشي لازم يخليكي جدا سعيدة !

التنظيم , و ترتيب الوقت و المهام و التنسيق, تعتبر المفاتيح الأساسية عشان تقدرين تتجاوزين تحدي الطلبات الكبيرة أو المواسم الكبيرة, الموضوع محتاج جهد و وقت , بس في النهاية صدقيني بيمر و بتكونين فخورة جدا بنفسك بعدها !

مرت علي كم سنة و أنا أشتغل في مجال الكوكيز, و خايفة جدا من مواجهة الطلبات الكبيرة, نظرا طبعا لقلة خبراتي في المجال, و كنت توني في بدايتي و تواجهني وايد مشاكل في الكوكيز و الآيسينج للطلبات الصغيرة و البسيطة, فشلون بيكون الوضع مع عدد كبير من القطع؟!

لين جا اليوم اللي حسيت فيه إني متمكنة شوي, و بطبعي أحب دايما أتحدى نفسي, و أشوف الشي اللي خايفة منه و أواجهه عشان أكسر خوفي, قررت أخوض هالتجربة و آخذ عدد كبير من الطلبات, و كان هالشي في موسم القرقاعون من 7 سنوات تقريبا !

كان الموضوع جدا موترني ما أنكر أبدا ! أعلنت حالة الطوارئ في البيت , لأول مرة عدد كوكيز كبير , يعني زبدة بكميات كبيرة, و أكياس طحين و سكر , و عفسة ما لها أول ولا آخر .

أول مشكلة واجهتني كانت إنه ما عندي غير صينيتين لخبز الكوكيز فقط ! قضيت يومين كاملين واقفة فقط عشان أخبز ! عجن, خبز , عجن, خبز ! فعلا يومين كاملين و أنا في هالدوامة!

المشكلة الثانية كانت وين بحط الكوكيز عقب التزيين ؟! ما بقى صينية, أو صحون كبيرة , و حتى صواني التقديم استخدمتها عشان أفرد الكوكيز ينشف! صواني الكوكيز كانت في كل مكان , كل غرفة في البيت فيها صينية أو ثنتين !

و ما أنسى ورشة التغليف اللي اشتركت فيها كل العائلة عشان تتم بأسرع وقت , ناهيكم عن الخربطة اللي صارت في الطلبات, و يتواصلون معاي الزبائن بسبب خربطة في الأوردر و المندوب رايح جاي ! لليوم ما تروح ذكرى أول قرقاعون من بالي !

المهم يا عزيزتي متأكدة كل وحدة فيكم مرت بهالتجربة , أو بتمر فيها قريبا , و لهالسبب حبيتن أذكر لكم تجربتي الشخصية عشان تعرفين إن الأمر طبيعي و ما تقلقين ! و يصير معانا كلنا, و جمعت لك هني بعض النقاط اللي وصلت لها بعد هالسنين, و خلت تعاملي مع المواسم الكبيرة أمر اعتيادي و بسيط و يمر بسلام.

1 . أول و أهم نقطة لازم تبتدين منها عقب ما تستلمين الطلبات هي إنك تنظمين وقتك , حاولي يكون عندك أسبوع كامل قبل المناسبة ما عندك فيه أي أوردر ثاني يشتت تركيزك.

2 . خلي عندك دفتر مخصص للمواسم الكبيرة, اكتبي فيه كل ملاحظاتك , عدد قطع الكوكيز اللي مطلوب منك تسويها, الألوان اللي بتحتاجينها حق الثيم و التصاميم اللي فيه .

3 . دفتر الطلبات و العناوين , في حال كانت الطلبات حق مواسم مثل القرقاعون و العيد و غيره, يعني عدد زباين وايد, و عناوين توصيل مختلفة, مهم تخصصين دفتر تكتبين فيه كل التفاصيل, إسم الزبونة و عنوانها و رقم تواصلها, و مهم جدا ترتبين مع شركة التوصيل و تعطينهم كامل العناوين عشان تكونين خلصتي من مموضوع التوصيل و تتفرغين حق باقي التجهيزات.

4 . تأكدي من توفر مخزون كافي من المواد الأساسية, الزبدة و الطحين و السكر والميرانغ باودر وغيره, وفري منهم كمية أكبر شوي من اللي بتحتاجينه للاحتياط عشان في حال لا سمح الله واجهتك أي مشكلة خلال الشغل و اضطريتي تحضرين كمية إضافية.

5 . تأكدي إنك توفرين عدد كافي من صواني الخبز, على الأقل 4-5 صواني , يسهلون عليكي الشغل وايد و يوفرون الوقت .

6 . جهزي البوكسات اللي بتخلين فيها الكوكيز و أكياس التغليف من وقت, و خليها جاهزة للاستخدام, لأن مع اقتراب الموعد المحدد للتسليم ما بيكون عندك الوقت ولا الجهد الكافي عشان تحضرينها !

7 . في المواسم الكبيرة و المناسبات الكبيرة, اختاري تصاميم الكوكيز بذكاء ! حاولي تختارين تصاميم بسيطة و مافيها تعقيدات كثيرة, و بنفس الوقت جميلة و ملفتة ! لو رجعتي لصفحتي في انستغرام و ألقيتي نظرة على تصاميم لمواسم القرقاعون و العيد الوطني و غيره, بتلاحظين انها تجمع بين البساطة و الجمال , كوكيز بتصاميم أقل, يعني وقت أقل و جهد أقل.

8 . حاولي تكون ألوان الثيمات بألوان باستيل أو الألوان الفاتحة بشكل عام قدر المستطاع, بتسهلين على نفسك موضوع التلوين, و بتسرعين فترة جفاف الكوكيز, لأن معروف إن الألوان الداكنة بتحتاج وقت أكثر للجفاف .

9 . حاولي توفرين مساحة كافية لفرد الكوكيز وقت الجفاف, مثل انك تخصصين غرفة محددة تخففين قطع الأثاث فيها و تخصصينها لترك الكوكيز فيها, و يفضل إنه يتم إغلاقها و منع الدخول لها عشان تضمنين الكوكيز ما يتعرض لأي حركة ممكن تأثر عليه, و إذا كان بمقدورك توفير العربة المخصصة لحمل صواني الكوكيز بيكون جدا ممتاز و بيوفر عليكي تعب و مساحات وايد!

10 . في حال كنتي ربة منزل و ما عندك أحد لمساعدتك, من الأفضل تجهزين كل التزاماتك المنزلية من وقت, مثل التحضير المسبق لوجبات الأكل مثلا , عشان تفرغين نفسك و يكون تركيزك بالكامل على الكوكيز .

11 . أشركي العائلة معاكي في مرحلة التغليف و التجهيز للتوصيل , و كتابة الفواتير مثلا , بيكون أسهل وايد عليكي.

و في النهاية لا تنسين تطلبين من كل زباينك إنهم يرسلون لك صور توزيعاتهم , عشان تحسين بمتعة إنجازك و حجم التحدي اللي قدرتي تجتازينه !