7 أشياء تمنيت لو عرفتها في بداياتي !

في بداية شغلي في مجال الكوكيز و تزيينه, كنت حرفيا أطبق كل التعليمات اللي أشوفها في المواقع أو في قنوات اليوتيوب اللي أتابعها, عشان أحصل أفضل نتيجة ممكنة, و كنت أتبعها بحذافيرها و أخاف آخذ أي خطوة خارج الخط عشان ما أواجه مشاكل أنا في غنى عنها ! تعرفون شلون لما يصير الشي منهج انتي ماشية عليه بس ولا مرة فكرتي تفكري خارج الصندوق و تشوفين شنو بيصير مثلا ؟!

اللي يصير هذا طبيعي طبعا في بداية مشوارك يا عزيزتي لا تقلقي, مع الوقت و التجارب و المحاولات المتعددة, بتبتدين شوي شوي تتجرئين تغيري شوي في الوصفات, أو تتجاوزي خطوة قالوا لك عنها مهمة, و تشوفين شنو بيصير بالضبط, و مع الوقت بيصير لك منهجك الخاص و طريقتك الخاصة اللي تمشين عليها و انتي مرتاحة .

اليوم بقول لك شوية أشياء لوعرفتها في بداياتي, كان سهلت علي وايد أشياء, و وفرت علي وقت و جهد , جمعتها لك عشان أختصر عليكي الطريق .

* أولا : نوعية الزبدة تفرق وايد في الطعم و النتيجة النهائية للكوكيز !

صحيح, كنت في بداياتي و نظرا لنقص خبرتي شوي في هالمجال, أعتمد اللي يقولونه , كانوا يقولون كل ما قللتي تكلفة المواد الأساسية, نجح مشروعك أكثر !

كنت أحتار بين نوعيات وايد في الزبدة, لين عرفت النوعية اللي تنباع بالكيلو, و سعرها طبعا جدا مجدي لأصحاب المشاريع مثل الكيك و البسكويت و غيره, طبعا كنت أخذها بدون تردد, و ماشية في مجالي و أخبز و أعجن و أموري طيبة, لكني احتجت شهور طويلة و يمكن سنين عشان أكتشف إن مشكلة بقع الزبدة على الكوكيز اللي تخليني ما أنام الليل و مو عارفة سببها و شلون أحلها , كان سببها الأساسي نوعية الزبدة الرديئة, اللي اكتشفت بعدين انها مكونة من خليط زيوت مهدرجة , و ليست زبدة طبيعية!

انتقلت بعدها مباشرة للشركات المعروفة مثل لورباك و المراعي, و اكتشفت فعلا إن المواد الأساسية هي لبنة الأساس في المشروع الناجح و ليست قلت التكلفة !

* ثانيا: لا تتقيدي بحرارة الفرن الموجودة بالوصفة !

كل وصفات الكوكيز تقول لك لازم حرارة الفرن تكون 170 – 180 درجة مئوية, بعد ثلاث أو أربع صواني كوكيز محترقة اكتشفت إن الدرجة المناسبة لخبز الكوكيز تعتمد على فرنك انتي و حرارته ! جربي أكثر من مرة لين تعرفين الدرجة الأنسب عشان تخبزين الكوكيز فيها, عن نفسي حاليا أخبز الكوكيز على حرارة 135 – 140 درجة مئوية !

* ثالثا : استخدام الطحين لفرد العجين أكبر غلط !

كنت دايما أعاني من جفاف قطع الكوكيز و قساوتها, صعوبة في فرد العجينة و تقطيعها, تصير العجينة قاسية و مطاطية! خلينا نفكر فيها بمنطق ..

كل ما تبين تفردين العجينة تضيفين طحين على الكاونتر و تفردين ( طبعا هذا اللي كل وصفات الكوكيز تقوله) , تقطعين اللي تحتاجينه منها و الباقي تلمينه و تردين تنثرين الكاونتر طحين و تفردين العجينة مرة ثانية..

متخيلة كمية الطحين الإضافية اللي دشت العجينة! استخدمي ورق الزبدة لفرد عجينة الكوكيز و ابتعدي عن الطحين !

* رابعا : مو كل ورق زبدة في السوق يناسب الكوكيز !

في البداية كنت آخذ أي منتج مكتوب عليه ورق خبز, أو ورق الفرن, أو ورق الطبخ و غيره من المسميات , بس بعدين عرفت ان الورق الأنسب لخبز الكوكيز هو اللي مكتوب عليه (ورق الشمع) , أو الواكس بيبر, جربيه و حتلاحظي الفرق!

* خامسا : إضافة اللون الأبيض لخليط الرويال آيسينج ما تقدم ولا تأخر !

نعم عزيزتي, كم موقع أجنبي زرتيه و لقيتيهم كاتبين لك ان إضافة اللون الأبيض للرويال آيسينج تعالج مشكلة بقع الزبدة, أو تمنع الرطوبة , أو تمنع تداخل الألوان ببعضها! كله كلام فارغ..

كنت أطلب اللون الأبيض بكميات هائلة, و أدفع تكلفة و شحن , و أضيفه للرويال ايسينج و مع ذلك المشاكل ما تختفي من عندي! كل مشكلة و لها حل, ابحثي عن الحلول في الأماكن الصحيحة ! و على فكرة إضافة اللون الأبيض للآيسينج بتزيد صعوبة تلوين الايسينج و الوصول لدرجات الألوان اللي تحتاجينها !

* سادسا : إتقان خليط الرويال آيسينج أهم مليون مرة من تعلم تصاميم جديدة و أفكار مبتكرة !

باختصار شديد, اذا الرويال آيسينج عندك غير متقن, و فيه مشاكل مو عارفة تحلينها, خلي تركيزك عليه و حاولي تعالجي مشاكله و تطورينه, أهم بوايد من إنك تدورين تكنيكات جديدة و تصاميم مبتكرة, تأكدي اذا الآيسينج عندك غير متقن من قوام و وصفة و غيره, كل التكنيكات الجديدة اللي بتتعلمينها ما بتقدرين تطبقينها!

* سابعا : مو كل سكر بودرة يناسب الرويال آيسينج !

كنت أعاني من موضوع السكر البودرة وايد في بداياتي, و ترا ما كان يتوفر على الرفوف بالسهولة اللي تشوفونها اليوم ! كنت أضطر أحيانا أسافر السعودية عشان أدور سكر بودرة زين , جربت شركات وايد بس كنت دايا أواجه مشكلة انسداد كيس الآيسينج خلال التزيين , و طبعا سببه إن السكر مو مطحون عدل !

بعدين اكتشفت مكان يوفر مستلزمات الخبز و الحلويات بكميات كبيرة, استانست و خذيت من عندهم كيس سكر بحجم 10 كيلو, و كانت الصدمة إن خليط الرويال آيسينج ما قام ينخلط عدل ولا يتكثف من الأساس, و انصدمت لين عرفت إنهم خالطين السكر البودرة بكمية كبيرة من النشا !!

الخلاصة , اخذي نوعية سكر بودرة ممتازة و تأكدي من المكونات انها سكر بودرة صافي و إنه مطحون عدل عشان تتجنبين المشاكل كلها!